Tourenbericht Südseite Grosser St. Bernhard Part ll

Mit Speck fängt man Mäuse

Am Fritig Morge si mir gschtartet mit däm himutruurige Sässelift uf e Crevacol. Nid nume dr Rüschegger het Müehi gha bim Ufschtige… nach däm Erläbnis und eme feine italiänische Cafe si mir aui wach gsi u hei dr erscht churz Ufschtig uf e Tete Crevacol i Agriff gno. Feinschte Pulverschnee het üs erwartet ir aschlüssende Abfahrt gägä d Passstrass. När hei mir ufgfäunet u si ufe Col de St. Rhémy 2580 m u hei gad nomau Pulver bis ad Strass ache gnosse. Dr aschlüssend Ufschtieg wieder Richtig Tete Crevacol isch de no schträng worde… uf dr Sunneterrasse vom Schigebiet hei mir es Bier trunke, när simer düre Sulz diräkt i Späckchäuer. Gli drufabe hei mir im Hotel des Alpes, mit em charmante Seniorchef, üsi Zimmer bezoge. D Chuchi het üs mit Valdostana Spezialitäte verwöhnt, es si aui satt bis übersatt worde. Bir Crema Catalana zum Dessär het de dr Elmar säuber zum Bunsebrönner griffe bis ne dr Chäuner gstoppt het!

Am nächschte Tag hets für üs am sächsi Zmorge gäh. Im Wettrenne mit de Seckler i de sexy Azüg hei mir üs nid la stresse u hei lieber di schön Landschaft gnosse. Wägem starche Wind si mir nid bis ganz ufe usgsetzt Gipfu vom Mont de Flassin 2772m, drfür het üs dr Willi dür wunderbari, mit Pulverschnee gfüllti Täli abegfüert. Die schönschti Spur het Tege i Schnee gleit! Nachere churze Pouse simer düre Lärcheschuss im Doppelsulz zersch id Bombardino Bar u när - i Späckchäuer natürlech!

O am letschte Tag hei mir wider früech us de Fädärä müesse, aber es het sich glohnt, so si mir vor de gfüute Hundert Italiäner gsi wo o Richtig Créton du Midi zoge si. Ufem Gipfu isches de mit Wind u steil u schlächter Sicht no churz chli abentürlech worde. Im Pulverschnee hei mirs de lasse fahre (O-Ton Friburger Elmar) u i de Lärchewäuder hei mir dr perfekt Sulzschnee gnosse. U de wo simer äch härä??? Genau, im Späckchäuer hei mir das mega coole Wuchenändi la usklinge. Mir si en unterhautsami u luschtegi Crew gsi - merci aune wo derbi gsi si! Spezieu em Willi fürs Finde vom perfekte Schnee u ar Tege für die top Organisation  (u di schöni Spur 😊)

TN: Bine, Tina, Brünu, Elmar, Glöisi, Rolf

TL: Tegi

Guide: Willi

Tourepricht verfasst vo (fasch) aune ufem Heiwäg im Bus, iz Reine gschribe vor Tina (uf Bärndütsch!)